PTH÷យោងតាមប្រភពព័ត៌មានដែលទុកចិត្តបានរាយការណ៍ឲ្យដឹងថា នៅវេលាម៉ោង១០.០០នាទីព្រឹកថ្ងៃទី១៣ ខែសីហា ឆ្នាំ ២០២៥ អាជ្ញាធរថៃ បានធ្វើការបិទសាលារៀន និងឱ្យកូនសិស្សវិលត្រឡប់ទៅផ្ទះវិញ ដើម្បីត្រៀមធ្វើការជម្លៀសប្រជាពលរដ្ឋ ដែលរស់នៅក្នុងភូមិដាន ឃុំដាន ស្រុកកាប់ជើង ខេត្តសុរិន្ទ ទៅទីកន្លែងមានសុវត្ថិភាព។ នេះបើយោងតាម សារព័ត៌មាន Fresh News ចេញផ្សាយម៉ោង៥.២៣នាទីល្ងាចថ្ងៃទី១៣ ខែសីហានេះ។យោងតាមប្រភពព័ត៌មានដដែល, កងទ័ពថៃបានគ្រោងនឹងវាយប្រហារមកលើកម្ពុជានៅយប់ថ្ងៃទី១៣ និងព្រឹកថ្ងៃទី១៤ ខែសីហា ឆ្នាំ២០២៥ ដោយកងទ័ពថៃបានចល័តកម្លាំងទ័ព និងសព្វាវុធជាច្រើនចូលមកក្នុងតំបន់ព្រំដែនកម្ពុជាថៃ ក្នុងនោះមានរថក្រោះជាច្រើនគ្រឿង ដើម្បីធ្វើសកម្មភាពឈ្លានពានដោយប្រដាប់អាវុធសារជាថ្មីមកលើបូរណភាពទឹកដីកម្ពុជា។ ទង្វើនេះបង្ហាញថា ភាគីថៃបានរំលោភបំពានយ៉ាងធ្ងន់ធ្ងរម្តងហើយម្តងទៀតលើបទឈប់បាញ់ ដែលសម្រេចបានក្នុងកិច្ចប្រជុំពិសេសនាថ្ងៃទី២៨ ខែកក្កដា ឆ្នាំ២០២៥ និងចំណុចសម្រេចក្នុងកិច្ចប្រជុំវិសាមញ្ញ របស់គណៈកម្មាធិការព្រំដែនទូទៅ GBC កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី។នេះជាលើកទី២ហើយ ដែលលេចធ្លាយព័ត៌មានផែនការវាយប្រហារជាមុនមកលើកម្ពុជា។ តែបន្ទាប់ពីព័ត៌មាននេះបានផ្សព្វផ្សាយជាសាកល ភាគីថៃ បានចេញមកច្រានចោល មិន ហានចេញប្រតិបត្តិការយោធា។ ជារៀងរាល់ថ្ងៃ ថៃតែងតែបញ្ជាកម្លាំងយោធា មករាយបន្លាលួសលើបូរណភាពទឹកដៃកម្ពុជា និងរហូតទាហានខ្លួនជាន់មីនដាច់ជើង ធ្វើជាលេសចោទកម្ពុជា៕
