ឯកឧត្តម សួស ប្រាថ្នា អញ្ជើញដឹកនាំកិច្ចប្រជុំពិនិត្យមើលវឌ្ឍនភាពការងាររៀបចំថ្នាលគ្រប់គ្រងរបាយការណ៍ស្តីពីការអនុវត្តការងាររបស់រដ្ឋបាលថ្នាក់ក្រោមជាតិ និងថ្នាលគ្រប់គ្រងទិន្នន័យស្ថិតិសេដ្ឋកិច្ចសង្គមរបស់រដ្ឋបាលថ្នាក់ក្រោមជាតិ

PTH÷ នាព្រឹកថ្ងៃទី៣០ ខែមីនា ឆ្នាំ២០២៦ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ អញ្ជើញដឹកនាំកិច្ចប្រជុំពិនិត្យមើលវឌ្ឍនភាពការងាររៀបចំ ថ្នាលគ្រប់គ្រងរបាយការណ៍ស្តីពីការអនុវត្តការងាររបស់រដ្ឋបាលថ្នាក់ក្រោមជាតិ និងថ្នាលគ្រប់គ្រងទិន្នន័យស្ថិតិសេដ្ឋកិច្ចសង្គមរបស់រដ្ឋបាលថ្នាក់ក្រោមជាតិ ដើម្បីនវានុវត្តន៍ ឌីជីថលភាវូបនីយកម្ម និងប្រសិទ្ធភាព នៅទីស្ដីការក្រសួងមហាផ្ទៃ។កិច្ចប្រជុំនេះមានការអញ្ជើញចូលរួមពីប្រធាននាយកដ្ឋានចំណុះអគ្គនាយកដ្ឋានរដ្ឋបាល ទីប្រឹក្សា និងមន្រ្តីជំនាញពាក់ព័ន្ធជាច្រើនរូប។ សូមបញ្ជាក់ជូនថា ថ្នាលគ្រប់គ្រងរបាយការណ៍ស្តីពីការអនុវត្តការងាររបស់រដ្ឋបាលថ្នាក់ក្រោមជាតិ និងថ្នាលគ្រប់គ្រងទិន្នន័យស្ថិតិសេដ្ឋកិច្ចសង្គមរបស់រដ្ឋបាលថ្នាក់ក្រោមជាតិ រៀបចំឡើងដើម្បីពង្រឹងប្រសិទ្ធភាពរដ្ឋបាលថ្នាក់ក្រោមជាតិ តាមរយៈការលើកកម្ពស់ការតាមដានត្រួតពិនិត្យ ការប្រើប្រាស់របាយការណ៍សម្រាប់ធ្វើសេចក្តីសម្រេចចិត្ត និងការរៀបចំផែនការអភិវឌ្ឍន៍ផ្អែកលើទិន្នន័យជាក់ស្តែងដើម្បីឆ្លើយតបនឹងតម្រូវការប្រជាពលរដ្ឋ និងយុទ្ធសាស្ត្រជាតិ។ ថ្នាលឌីជីថលនេះនឹងជួយបង្កើនប្រសិទ្ធភាពការងាររដ្ឋបាលតាមរយៈការស្វ័យប្រវត្តិកម្មទិន្នន័យ ការតាមដានសូចនាករវាស់វែងប្រសិទ្ធភាពការងារ (KPI) នៅកម្រិតឃុំ/សង្កាត់, ស្រុក/ខណ្ឌ និង រាជធានី/ខេត្ត,  និងការធ្វើសមាហរណកម្មបច្ចេកវិទ្យាទំនើប (AI & GIS) ដើម្បីជំរុញការសម្រេចចិត្តឱ្យកាន់តែរហ័ស ច្បាស់លាស់ និងសន្សំសំចៃធនធាន និងបង្កើនភាពងាយស្រួលក្នុងការចែករំលែកទិន្នន័យរវាងស្ថាប័នពាក់ព័ន្ធ៕