PTH÷ ក្នុងឱកាសអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងដាក់ទិសដៅការងារបន្តឆ្នាំ២០២៦ របស់សាខាកាកបាទក្រហមខេត្ត នាព្រឹកថ្ងៃព្រហស្បតិ៍ ទី២២ ខែមករា ឆ្នាំ២០២៦ ឯកឧត្តម វ៉ី សំណាង អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានជំរុញទៅដល់សាខាកាកបាទក្រហមខេត្ត ត្រូវបង្កើនសកម្មភាពរបស់ខ្លួនបង្រៀនតាមវិទ្យាល័យទាំងអស់ក្នុងខេត្ត អំពីបំណិនជីវិតដល់យុវជនស្ម័គ្រចិត្ត ដើម្បីកសាងសង្គមមួយដែលចេះស្រឡាញ់គ្នា ចេះជួយគ្នា និងចេះជួយយកអាសារគ្នាទៅវិញទៅមក។ឯកឧត្តម បានសង្កត់ធ្ងន់ថា «យើងមានវិទ្យាល័យច្រើន ដូច្នេះសុំឱ្យបង្កើនសកម្មភាពបង្រៀនតាមវិទ្យាល័យនានា ដល់ក្មួយៗសមាជិកដែលជាយុវជនស្ម័គ្រចិត្តរបស់កាកបាទក្រហម។ ការបង្រៀនអំពីបំណិនជីវិត នឹងធ្វើឱ្យពួកគាត់មានទស្សនវិស័យច្បាស់លាស់ក្នុងការងារស្ម័គ្រចិត្ត។ អ្វីដែលសំខាន់បំផុត គឺការរៀបចំអត្តចរិត និងបេះដូងរបស់ពួកគាត់ឱ្យចេះធ្វើអំពើល្អ។ ខ្ញុំចង់ឱ្យបង្រៀនចំណុចនេះឱ្យបានល្អបំផុតតាមគ្រប់វិទ្យាល័យ ដើម្បីឱ្យពួកគាត់យល់ដឹងអំពីការចេះជួយគ្នា»។ឯកឧត្តម អភិបាលខេត្ត និងជាប្រធានសាខា បានជឿជាក់ថា «សកម្មភាពទាំងអស់របស់កាកបាទក្រហម គឺការបង្ហាញអំពីការចេះចែករំលែក សេចក្ដីស្រឡាញ់ និងការចេះជួយយកអាសារគ្នាទៅវិញទៅមក។ នៅពេលដែលយុវជនរបស់យើងយល់ដឹងពីចំណុចទាំងនេះ ហើយចាកចេញពីសាលារៀនទៅរស់នៅក្នុងសង្គម ពួកគាត់នឹងអាចដឹកនាំខ្លួនឯងបានល្អ។ ខ្ញុំជឿជាក់ថា បំណិនជីវិតដែលពួកគាត់បានរៀនសូត្រពីកាកបាទក្រហម គឺជា ‘របត់’ ដ៏សំខាន់ដែលធ្វើឱ្យពួកគាត់ក្លាយជាមនុស្សដែលចេះស្រឡាញ់គ្នា និងចេះជួយគ្នា»។ឯកឧត្តម វ៉ី សំណាង ក៏បានដាក់ទិសដៅដល់គណៈកម្មការសាខាខេត្ត ត្រូវបន្តខិតខំស្វែងរកវិធីសាស្ត្រថ្មីៗ ដើម្បីពង្រឹងស្មារតីក្មួយៗយុវជនស្ម័គ្រចិត្តទាំងអស់ឱ្យមានបំណិនជីវិតច្បាស់លាស់ ប្រកាន់ខ្ជាប់នូវសេចក្ដីល្អ និងសកម្មលើការងារមនុស្សធម៌ ដើម្បីជាប្រយោជន៍ដល់ប្រជាពលរដ្ឋរងគ្រោះ និងងាយរងគ្រោះក្នុងខេត្តតាកែវទាំងមូល៕
លេខទំនាក់ទំនងអង្គភាពភ្នំពេញទាន់ហេតុការណ៍/088 20000 43 /078 75 30 37
